धरान, क्रिएटिभ स्कुल सर्कल धरानद्वारा आयोजित एकल लोक नृत्य प्रतियोगिताको विजेता हिविसकस बोर्डिङ स्कुल धरान-१५ को छात्रा नायोमा राई भएको छ।
यसैगरी दोस्रो एप्पल मन्टेश्वरी ईलिमेन्ट्री स्कुल धरान ११ को छात्रा परिश्ना राई र तेस्रो बुद्ध आदर्श बोर्डिङ स्कुलको छात्र सत्कर्म योगी भएका छन्। प्रथमले ट्रफी, प्रमाणपत्र र नगद ३५ हजार प्राप्त गरे भने दोस्रो र तेस्रोले ट्रफी, प्रमाणपत्र सहित जनही २५ सय र १५ सय प्राप्त गरे।
आज धरान-११ स्थीत जोलसाया एकेडेमीमा आयोजित प्रतियोगितामा धरानको ९ वटा विधालयका विद्यार्थीहरुले सहभागिता जनाएका थिए।
क्रिएटिभ स्कुल सर्कल धरानका अध्यक्ष गंगाराम राईको सभापतित्व र धरान उपमहानगरपालिकाका उपप्रमुख आईन्द्रविक्रम वेघाको प्रमुख आतिथ्यमा भएको प्रतियोगिताको निर्णायकहरुमा नृत्य निर्देशकद्वय मनिकुमार राई र अन्जु राई रहेका थिए।
क्रिएटिभ स्कुल सर्कल धरानद्वारा आयोजित एकल लोक नृत्य प्रतियोगिता तथा खेलकुद सप्ताह २०८१ अन्तर्गत उक्त नृत्य प्रतियोगिता आयोजना भएको आयोजकले जानकारी दिए।
