धरान, भिम लामा फिल्मस् प्रा.लि.को व्यानरमा निर्माण हुन लागेको नेपाली कथानक चलचित्र ‘‘लडाई पहिचानको’’ नामक चलचित्रको आज(बिहिबार) साँझ शुभ मुर्हत भएको छ।
भिम लामाको निर्देशनमा बन्न लागेको उक्त चलचित्रका नायक धिरेन शाक्य, नायिका करिश्मा मानन्धर सहित शुभ मुर्हतका प्रमुख अतिथी रहेका चलचित्रकर्मी महासंघ कोशीका अध्यक्ष अरुणकुमार प्रधान, अतिथीहरु याक्थुङ चलचित्रकर्मी संघका अध्यक्ष नबिन मेन्याङ्बो, नेपाल पत्रकार महासंघ सुनसरीका अध्यक्ष सन्तोष काफ्लेले संयुक्त रुपमा धरान–१४ स्थीत बुढासुब्बा मन्दिरमा शुभ मुर्हत गरेका छन्।
चलचित्रको पर्दामा धेरै समय पछि धिरेन शाक्य र करिश्मा मानन्धरलाई एकै साथ उक्त चलचित्रमा दर्शकहरुले देख्न पाउने बताउँदै चलचित्रका लेखक तथा निर्देशक भिम लामाले चलचित्र दर्शकहरुलाई राम्रो लाग्ने किसिमको बन्ने दाबी गरेका छन्।
निर्देशक लामाको अनुसार चलचित्रमा समग्र देशका सातै प्रदेशमा रहेका सम्पुर्ण समुदायको पहिचान उठान गरिएको छ। देशका संगीतकर्मी, चलचित्रकर्मी, कलाकर्मी, मिडियाकर्मी सबै क्षेत्रको पहिचानको विषयलाई चलचित्रमा उठान गरिएको छ।
चलचित्रको विषय कस्तो किसिमबाट उठाईएको छ? भन्ने कुरा जान्नलाई चलचित्र हेरेपछि मात्र थाहा हुने निर्देशक लामा बताउछन्।
चलचित्रमा नायक धिरेन शाक्य, नायिका करिश्मा मानन्धरको मुख्य अभिनय रहेको छ भने कलाकारहरुमा प्रशान्त तामाङ, राजेन्द्र खड्की, सुरवीर पण्डित, प्रेम सुब्बा, किशोर सम्बाहाम्फे, जेनी घिसिङ, शर्मिला राई, रोशन शर्मा, जामजी विष्टलगायतको अभिनय रहेको छ।
यसैगरी चलचित्रको पटकथा भिम लामा, सरोज के.सी, रमेश विशुङ्खेका रहेको छ, भने निमार्ताहरु भिम लामा, रामजी विष्ट, उमेश तामाङ्ग रहेका छन्।
यसैगरी मुख्य सहायक निर्देशन रमेश विशुङ्खे, सहायक निर्देशन बुद्धिमान तामाङ्ग, द्वन्द निर्देशन देव महर्जन, प्रोडक्सन मेनेजर, सुरज खड्का, छायांकन मदन कास्यप घिमिरे, नृत्य निर्देशन मणिकुमार लिम्बु, सानुराजा थेगिमको रहेको छ।
