धरान, धरानमा प्रदेश स्तरीय दोस्रो ङिङ्मा मोलम(प्रणिधान) शान्ति पुजापाठ हुने आयोजना हुने भएको छ।
मानव लगायत पशुपन्छी, जनावरलगायतलाई आईपर्ने ग्रह शान्ति गर्ने उदेश्यले मोलमको आयोजना गर्न लागिरहेको आज(शनिबार) धरानमा पत्रकार सम्मेलन गरि आयोजक १ नंबर प्रदेश ङिङ्मा मोलम, छेग्पा समितिका सचिव राजेन्द्र स्याङ्बो तामाङले जानकारी गराएका छन्।
वौद्ध धर्मका चार धामको रुपमा रहेको गौतम वुद्धको जन्म, ज्ञान प्राप्त, उपदेश दिएको र अन्तिम परिनिमार्ण गरेका चार मुख्य ठाउँहरु लुम्बिनी, बोध गयालगायतको ठाउँलाई मानिने गरिएको छ।
ती चारधाममा नेपालको पूर्वका विभिन्न स्थान तथा भारतको सिक्किम, दार्जिलिङलगायत स्थानबाट मोलमको लागि वौद्ध धर्मालम्बीहरु आर्थिक र टाढा दुरीको कारणले जान असमर्थ भएकाले धरान स्थीत चारधाममा मोलमको अयोजना गरिएको सचिव स्याङ्बोले बताए।
धरान–८ स्थीत बौद्ध दाह संस्कार स्थलमा बौद्ध चारधाम पर्यटकीय केन्द्रलाई हाल वौद्ध धर्मावलम्बीको चारधामको रुपमा बिकास गरिएको छ। उक्त चारधाममा ज्याक्याङ कुस्योग गुरुको अवतारी टुल्लु साङगे सेडुब तामाङ रिम्पोछेको उपस्थीतिमा मोलम हुने भएको छ।
भोलि(२५ गते आईतबार) गुरुको स्वागत कार्यक्रम रहेको छ। भने पर्सी फागुन २६ गतेबाट मोलम सुरु भई २९ गते समापन हुने भएको छ।
विश्वशान्तिको कामना सर्बप्राणीहरुको हितार्थ, नयाँ लो (वर्ष) को ग्रह, दशा शान्ति र स्वर्गबास भएका पितृहरुको मोक्षको निम्ति दोस्रो पटक आयोजना हुने प्रदेश स्तरीय ङिङ्मा मोलम(प्रणिधान)बाट धरानको पर्यटन प्रवद्र्धनमा टेवा पुग्ने अध्यक्ष खेन्छेन तेन्जिङ तामाङले बताए।
