धरान, दुर्व्यसन विरुद्धको प्रदेश स्तरीय अभियान आजबाट शुभारम्भ भएको छ।
“अवको युद्ध दुर्व्यसन विरुद्ध” भन्ने नाराका साथ आज इटहरी उप-महानगरपालिका-६ स्थित म्याजिक स्टेण्डमा आन्तरिक मामिला तथा कानून मन्त्रालय कोशी प्रदेश, कोशी प्रदेश प्रहरी कार्यालय बिराटनगर तथा जिल्ला प्रहरी कार्यालय सुनसरीको आयोजनामा उक्त अभियान सुरु भएको हो।
कोशी प्रदेशका मुख्यमन्त्री हिक्मत कुमार कार्कीको प्रमुख आतिथ्यता प्रहरी बैण्ड सहित नेपाली सेना, नेपाल प्रहरी, सशस्त्र प्रहरीबल, पुर्व प्रहरी संगठन, बिभिन्न बिद्यालय, संघ-संस्था, नागरिक समाज, संचारकर्मी तथा स्थानीय वासीहरुको सहभागीतामा लागूऔषध विरुद्धका जनचेतना मुलक प्लेकार्ड सहित प्रभातफेरी र्याली निकाली कार्यक्रमको शुभारम्भ भएको हो।
कार्यक्रममा प्रमुख अतिथि माननीय मुख्यमन्त्री हिक्मत कुमार कार्कीले उक्त दुर्व्यसन विरुद्धको अभियानलाई कम्प्युटरको माध्यमबाट डिजिटल बटम थिचेर कोशी प्रदेशका १४ वटै जिल्लामा एकै साथ शुभारम्भ गरेका छन्।
कार्यक्रममा प्रमुख अतिथिले लागूऔषधको दुर्व्यसनले हाम्रो समाजलाई पछाडि धकेली रहेको बताउँदै आजबाट सुरु भएको लागूऔषध विरुद्धको अभियानलाई सफल बनाउन तीनै तहको सरकार, सुरक्षा निकाय, दुर्व्यवसन विरुद्धका अभियन्ताहरु सवै मिलि सहकार्य र हातेमालो गरी अगाडि बढेमा दुर्व्यसन मुक्त समाज निर्माण गर्न सकिने बताए।
कार्यक्रममा मुख्यमन्त्रीले अभियान अन्तरगत गठन भएका क्लवका पदाधिकारीहरुलाई अभियानको टि-सर्ट बितरण गरे।
यसैगरी लागूऔषध दुर्व्यसन विरुद्ध विभिन्न सचेतना मुलक कार्यक्रमहरु संचालन तथा जनचेतना अभिबृद्धि गर्ने कार्यमा सकृय रहेका बिभिन्न बिद्यालय तथा संघ संथामा आवद्ध महानुभावहरुलाई प्रशंसा पत्रद्वारा सम्मान गरे।
उक्त अभियानका परिकल्पनाकार कोशी प्रदेश प्रहरी प्रमुख प्रहरी नायव महानिरीक्षक राजन अधिकारीलाई उनको सकृयताको सम्मान गर्दै अभियानको जिल्ला कार्य सम्पादन समितिको तर्फबाट सम्मान पत्र प्रदान भएको थियो।
कार्यक्रममा अभियानका परिकल्पनाकार नायव महानिरीक्षक अधिकारीले बिशेष गरी किशोर अवस्थाका बालबालिकाहरु साथी भाईको दवाव, ठूलाबडाको सिको, आफ्नो जिज्ञासा, भ्रम वा अज्ञानताको कारण लागूऔषधको दुर्व्यवसनमा फस्ने उच्च जोखिम रहेको बताउँदै, अवको युद्ध दुर्व्यसन विरुद्ध भन्ने नारालाई आत्मसाथ गर्दै सबै एक जुट भई अगाडि बढ्न आह्वान गरे।
कार्यक्रममा कोशी प्रदेशका आन्तरिक मामिला तथा कानून मन्त्री रेवती रमण भण्डारीले कार्यक्रमलाई यतिमै सिमित नराखी आगामी आर्थिक बर्षमा थप बजेट तथा नीति कार्यक्रमका साथ लागूऔषध दुर्व्यवसनको बढ्दो दरलाई घटाउन सचेतनामुलक कार्यक्रमहरु सहितको आयोजना बनाई अगाडि बढ्ने बताए।
कार्यक्रममा इटहरी उप-महानगर पालिकाका प्रमुख हेमकर्ण पौडेल, तत्कालिन सुनसरी जिल्लाका सहायक प्रमुख जिल्ला अधिकारी अभियानका पुर्व संरक्षक ध्रुव बहादुर खडका, जिल्ला कार्य समिति सुनसरीकी बिमला ढकाल, लागूऔषध दुर्व्यसन विरुद्ध सक्रिय मनोज सुवेदी, उक्त अभियान अन्तरगतका क्लबका पुर्व बिद्यार्थी रंजु दाहालले मन्तव्य राखे।
उक्त कार्यक्रममा प्रहरी कर्मचारीहरुले “जागौं सबै जागौं, लागौं सवै लागौं दुर्व्यवसनको विरुद्धमा” भन्ने गितको बोलमा लागू औषध दुर्व्यसन विरुद्ध सचेतनामुलक नृत्य प्रस्तुत गरेका थिए ।
कार्यक्रममा कोशी प्रदेशका सामाजिक विकाश मन्त्री पाँचकर्ण राई, पर्यटन तथा वन मन्त्री सदानन्द मण्डल, कोशी प्रदेश सभा सदस्यहरु, बिभिन्न मन्त्रालयका सचिवहरु, प्रमुख जिल्ला अधिकारीहरु, प्रदेश तथा जिल्ला स्थित सुरक्षा निकायका प्रमुखहरु, बिभिन्न पालिकाका प्रमुख तथा उप-प्रमुखहरु, विभिन्न सुधार केन्द्रका प्रमुख तथा प्रतिनिधिहरु, पूर्व प्रहरी कर्मचारीहरु, बिभिन्न संघ संस्थाका प्रमुख तथा प्रतिनिधिहरु, संचारकर्मीहरु, नागरिक समाज, बुद्धिजिवि, बिभिन्न बिद्यालयका शिक्षक एवं बिद्यार्थीहरु लगायत प्रहरी कर्मचारीहरुको उपस्थिति रहेको थियो ।
