धरान, गोर्खा सिमेट्रिज ट्रष्ट नेपालद्वारा आयोजित १० किमि दौड प्रतियोगिता ‘तेस्रो गोर्खा ब्लेजर दौड’ भोलि शनिबार बिहान ६ बजेबाट सुरु हुने भएको छ।
आयोजक ट्रष्टका अध्यक्ष महेन्द्र राईका अनुसार दौड धरान १८ रत्नचौकबाट सुरु भई धरान ११ मंगलबारे चोक हुदै वडा नं २० स्थित गोर्खा स्मृति पार्कमा पुगेर टुंगिने छ।
दौड समापन पछि दोस्रो विश्वयुद्ध लडेका खोटाङ, जन्तेढुगाका हाल उदयपुर बेल्टार निवासी १०२ वर्षीय भूपू ब्रिटिस सैनिक दलबहादुर राई, धरान १८ रत्नचौक निवासी पूर्व ब्रिटिस गोर्खा सैनिक दिवंगत क्याप्टेन रत्नमान राईकी श्रीमति ८६ बर्षीय रामकुमारी राई र भूपू ब्रिटिस गोर्खा सैनिक ८५ वर्षीय कृष्णदेव राई सम्मान गरिने भएको छ।
विश्व शान्तिको लागि प्रथम, दोस्रो र विभिन्न युद्धमा सहिद भएका बीर गोर्खालीहरुको सम्मान र स्मृतिमा आयोजित उक्त प्रतियोगितामा प्रथम, दोस्रो र तेस्रो हुने धावक धाविकाले जनही क्रमशः नगद २० हजार, १० हजार र ५ हजार, मेडल र प्रमाण पत्र पाउनेछन्।
दौडमा प्रथम हुने धावकधाविकालाई आगामी वर्ष सन् २०२६ मा हङकङमा हुने गोर्खा ट्रेल ब्लेजर रनमा सहभागिता जनाउने अवसर प्रदान गरिने अध्यक्ष राईले जानकारी दिएका छन्।
