बिराटनगर, कोशी प्रदेश अन्तरगत रहेका बिभिन्न कार्यालयहरुका प्रहरी कर्मचारीहरुलाई विपतको बेला भत्केको संरचनामा गरिने खोज तथा उद्दार सम्बन्धी ७ दिने अनुशिक्षण तालिम प्रदान गरिएको छ।
कोशी प्रदेश प्रहरी कार्यालय विराटनगरको तत्वावधानमा संचालनमा फागुन २५ गतेबाट संचालन भएको उक्त तालिम चैत्र ४ गते सम्पन भएको हो।
प्रहरी कर्मचारीहरूलाई खोज तथा उद्दार सम्बन्धि तालिम दिई उद्दार कार्यलाई थप प्रभावकारी बनाउन अनुशिक्षण तालिम प्रदान गरिएको कोशी प्रदेश प्रहरी कार्यालयका निमित्त कार्यालय प्रमुख भीम बहादुर दहालले बताए।
कोशी प्रदेश प्रहरी कार्यालयको सभाहलमा आयोजित समापन समारोहका प्रमुख अतिथी रहेका प्रमुख दाहालले मानव जीवनमा आईपर्ने कठोरतम् विपत्तिको उद्धार कार्यको प्रमुख जिम्मेवारी पाएको नेपाल प्रहरीले आफुसंग भएका सिमित स्रोत साधनका साथै स्थानिय औजारहरुको समेत प्रयोग गरी प्रभावकारी रुपमा खोज तथा उद्दार कार्यमा खटिई मानविय तथा भौतिक क्षेति न्यूनीकरण गर्न तालिममा सहभागी प्रशिक्षार्थीहरुलाई निर्देशन दिए।
यसैगरी उनले तालिमबाट सिकेका सिप, ज्ञान र कौसलको उच्चतम प्रयोग गरी कार्य क्षेत्रमा आईपरेको समस्या र चुनौतीलाई सामना गरी उद्दारकार्यमा खटिई नेपाल प्रहरीको गौरवलाई सदैव उच्च स्थानमा राख्न अभिप्रेरित गरे।
समापन कार्यक्रममा तालिम संयोजक प्रहरी नायव उपरीक्षक डम्बर बहादुर पुरीले तालिम सम्बन्धी प्रतिबेदन प्रस्तुत गरे भने कार्यक्रममा प्रहरी उपरीक्षक दिपक पोखरेल सहित सिनियर तथा जुनियर प्रहरी अधिकृतका साथै प्रहरी कर्मचारीहरुको उपस्थिति रहेको थियो।
उक्त तालिममा कोशी प्रदेश अन्तरगत रहेका बिभिन्न कार्यालयहरुका ३० जना प्रहरी कर्मचारीहरुको सहभागिता रहेको संयोजक नायक उपरीक्षक पुरीले जानकारी दिए।
