धरान, २५औं अन्तर वडा स्तरीय रात्री कालिन फुटबल प्रतियोगिता ‘गोधुली फुटबल रनिङ कप’ भोलि (चैत्र ७ गते) सुरु हुने भएको छ।
गोधुली क्लब धरानको अयोजनामा धरान रंगशालामा भोलि चैत्र ७ गते सुरु भएर चैत्र २१ गतेसम्म संचालन हुने आयोजक क्लबले आज पत्रकार सम्मेलन मार्फत जानकारी गराएका छन्।
क्लबका उपाध्यक्ष सतिस केसीका अनुसार प्रतियोगिता साझ ७ बजे सुरु हुनेछ। प्रतियोगितामा धरान २ र ७ नंबर वडा बाहेकका अरु १८ वटा वडाले भाग लिने छ। भने उदघाटन खेल वडा नंबर ५ र १६ वीच हुनेछ।
प्रतियोगिताको उद्घाटन कार्यक्रममा चर्चित गायक पूर्ण राई एण्ड दाजुभाइको साँगितिक प्रस्तुती समेत हुनेछ।
प्रतियोगिताको महत्व तथा आवश्यकताको महशुस गर्दै धरानको फुटबल प्रतियोगिताको इतिहासमै पहिलो पटक रात्री कालीन उक्त ‘गोधुली फुटबल रनिङ कप’ सुरु हुन लागेको हो।
प्रतियागिताको विजेता टिमले १ लाख ५० हजार र उपविजेता टिमले ७५ हजार पुरस्कार पाउने भएको छ। विजेता र उपविजेताका लागि २५/२५ हजार रुपैया धरान १८ का वडा अध्यक्ष नरेन्द्रकुमार राई (प्रविण)ले दिने घोषण गरेका छन्।
प्रतियोगिता म्यान अफ दि म्याच, उत्कृष्ट गोल किपर, उत्कृष्ट मीड फिल्डर, उत्कृष्ट डिफेन्डर, उत्कृष्ट कोच, उदयमान खेलाडीलाई जनही ५ हजार ५ सय रुपैया नगद पुरस्कार प्रदान गरिने भएको छ।
भने उत्कृष्ट सर्वाधिक गोलकर्तालाई ७ हजार ५ सय र उत्कृष्ट खेलाडीलाई १५ हजार नगद पुरस्कार प्रदान गरिने क्लबका अध्यक्ष देशकुमार राईले बताए। अध्यक्ष राईका अनुसार प्रतियोगिता सम्पन्न गर्न कुल खर्च २४ लाख लाग्ने रहेको छ।
