धरान, धरानमा जारी २५औं संस्करणको गोधुली रनिङ कप अन्तर वडा स्तरिय फुटबल प्रतियोगितामा क्वाटर फाइनलको समिकरण पुरा भएको छ।
धरान रंगशालामा बुधबार साँझ भएको अन्तिम प्रि-क्वाटर फाइनल खेलमा ६ न वडाले १० न वडालाई ४-० गोलले पराजित गर्दै क्वाटर फाइनलमा प्रबेश गरेको छ।
खेलको सुरुवातदेखि नै १० नं. वडालाई निकै दबाबमा राखेको थियो। खेलको १३ औ मिनेटमा ६ नं. वडाले सुरुवाती अग्रता बनाएको थियो। सन्देश राईको गोलमा अग्रता बनाएको ६ न वडाले खेलको १८औं मिनेटमा सुवास राना मगरको गोलमार्फत् अग्रता दोब्बर बनाएको थियो।
त्यसको एक मिनेट नबित्दै सन्देश राईले थप एक गोल गर्दै अग्रता तेब्बर बनाएका थिए। लगातार गोल खाएर चर्को दबाबमा परेको १० न वडा पहिलो हाफ सकिदा ३–० ले पछि परेको थियो।
यस्तै, खेलको ५० औ मिनेटमा फेरी १० न वडाले गोल खान पुगेको थियो। यमन मगरले गोल गर्दै ६ नं. वडाले फराकिलो जित हासिल गर्न सफल भएको थियो। दोस्रो हाफमा आइपुग्दा १० न वडाले खेलको लय समाउदै सुधारिएको प्रदर्शन गरेपनी गोल गर्न भने सकेन।
खेलको म्यान अफ द म्याच ६ नं. वडाका सन्देश राई घोषित भए। अब ६ नं. वडाले सेमिफाइनल यात्राका लागि क्वाटर फाइनलमा १४ नं. वडाको सामना गर्नेछ। पराजित भएसंगै प्रतियोगिताबाट बाहिरिएको १० न वडाले १२ न वडालाई पराजित गर्दै प्रि-क्वाटर फाइनल पुगेको थियो।
बिहीबारको खेल गतवर्षको विजेता धरान वडा नं. १३ र उपाधिको दाबेदार मध्येको एक १५ नं. वडा बीच पहिलो क्वारटर फाइनल खेल ६ः३० बजे धरान रंगशालामा सुरु हुने आयोजकले जानकारी दिएको छ। चैत्र २१ गतेसम्म सञ्चालन हुने प्रतियोगितामा धरानका १८ वटा वडा सहभागी छन्।
प्रतियोगिताको विजेताले १ लाख ५० हजार र उप विजेताले ७५ हजार नगद पुरस्कार प्राप्त गर्नेछन् भने प्रतियोगिताको क्वाटर फाइलनमा पुगेको टिमले स्व. सुवास राई स्मृति सुपर ८ प्रतियोगितामा सहभागी हुने अवसर प्राप्त गर्ने आयोजक गोधुली क्लबले जनाएको छ।
