धरान, श्री सुच्चा राई कल्याणकारी समाजले रक्तदान र अग्रज सम्मान कार्यक्रम आयोजना गरेका छन्।
समाजको २५औं स्थापना दिवसको अवसरमा आज(शनिबार) धरानको भानुचौक स्थीत लोकतान्त्रिक चौतारीमा रक्तदान कार्यक्रम तथा समाजका अग्रज व्यक्तिहरुलाई सम्मान गरेको हो।
नेपाल रेडक्रस सोसाइटी जिल्ला शाखा सुनसरीको सहयोगमा भएको रक्तदान कार्यक्रममा १ सय ६२ पिन्ट रगत संकलन भएको छ।
यसैगरी कार्यक्रमा समाजका अग्रज व्यक्तिहरु सुच्चा चेली ८६ वर्षीय गंगा सुच्चा राई र बंश दाजुभाई ९८ वर्षीय मेखजित राईलाई सम्मान गरिएको छ भने धरान–११ स्थीत समाजको निमार्णाधीन सामुदायिक भवन निर्माण समितिका संयोजक चण्डिप्रसाद सुच्चा राईलाई कदर पत्र प्रदान गरिएको छ।
समाजका केन्द्रिय सल्लाहकार क्याप्टेन ढुण्डीराज सुच्चा राईको सभापतित्वमा भएको उक्त कार्यक्रमको प्रमुख अतिथीमा कोशी प्रदेश योजना आयोगका सदस्य किशोर थुलुङ राई रहेका थिए।
यसैगरी अतिथीहरुमा नेपाल यातायात स्वतन्त्र मजदुर संगठनका केन्द्रिय अध्यक्ष भिम ज्वाला राई, नेपाल पत्रकार महासंघ सुनसरीका अध्यक्ष सन्तोष काफ्ले, प्रेस चौतारी नेपाल सुनसरी बिकास चाम्लिङ्ग राई, वडा प्रहरी कार्यलयका ईन्चार्ज रुद्रबहादुर खड्का सहित विभिन्न संघसंस्थाको प्रतिनिधीहरु रहेका थिए।
श्री सुच्चा सुच्चा राई कल्याणकारी समाज बान्तावा तथा दुङ्माली भाषी समुदायको सँस्कृतिको संरक्षणका लागि बि.सं.२०५६ सालमा स्थापना गरिएको हो।
भोजपुर रामप्रसाद गाउँपालिका स्थित कटुन्जे उद्गम स्थल रहेको सुच्चा राई समुदाय हाल देशभर करिब १२ हजारको संख्यामा रहेको समाजका केन्द्रिय अध्यक्ष बिनोद कुमार राईले बताएका छन्।
अध्यक्ष राईको अनुसार सुच्चा राईहरुको संस्कार सँस्कृतिको संरक्षण गर्दै समाज सेवामा योगदान पुर्याउने उदेश्यले यस्ता कार्यक्रमहरु समाजले संचालन गर्दै आएको छ।
