धरान, धरानमा जारी २५औं संस्करणको गोधुली रनिङ कप फुटबल प्रतियोगितामा १० नं. वडा प्रिक्वाटर फाइनलमा प्रवेश गरेको छ।
धरान रंगशालामा शुक्रबार भएको खेलमा १२ नं. वडालाई टाइब्रेकरमा ४-२ गोल अन्तरले पराजित गर्दै १० न. वडाले प्रिक्वाटर फाइनलको यात्रा तय गरेको हो।
निर्धारित समयको खेलमा गोल रहित बरारबरीमा सकिएपछि खेलको नतिजा टाइब्रेकरबाट लिइएको थियो। टाइब्रेकरमा १० नं. वडाको तर्फबाट निमेश लिम्बू, सिसल लिम्बू, शुभम भूजेल र आशिष राईले गोल गरेका थिए भने १२ नं. वडाको तर्फबाट सञ्जीव राई र सुमन राईले मात्रै गोल गरेका थिए।
धरान १२ नं. वडाका सरोज लिम्बूको प्रहार बाहिरिदा आयुष राईको प्रहार बिपक्षी १० नं. का गोल किपर कस्तुप पिठाकोटे मगरले रोकेसंगै १२ न वडा प्रतियोगिताबाट बाहिरियो।
खेलको म्यान अफ द म्याच १० नं. वडाका गोल किपर कस्तुप पिठाकोटे मगर घोषित भए। शनिबारको खेल वडा नं. ८ र १५ का बीच साझ ६ बजेदेखि सुरु हुने आयोजकले जानकारी दिएको छ।
चैत्र २१ गतेसम्म सञ्चालन हुने प्रतियोगितामा धरानका १८ वटा वडा सहभागी छन्। प्रतियोगिताको विजेताले १ लाख ५० हजार र उप विजेताले ७५ हजार नगद पुरस्कार प्राप्त गर्नेछन् भने प्रतियोगिताको क्वाटर फाइलनमा पुगेको टिमले स्व. सुवास राई स्मृति सुपर ८ प्रतियोगितामा सहभागी हुने अवसर प्राप्त गर्ने आयोजक गोधुली क्लबका उपाध्यक्ष सतिस केसीले जानकारी दिए।
