धरान, गोर्खा सेमिट्रिज ट्रष्ट नेपालको आयोजनामा आज धरानमा सम्पन्न 'तेस्रो गोर्खा ट्रेलब्लेजर-२०२५' दौड प्रतियोगिताका विजेता महिला तर्फ प्रथम पाँचथरकी पुष्पा शेर्मा लिम्बू र पुरुष तर्फ प्रथम तेह्रथुमका सरोज लिम्बू भएका छन्।
धरान-१८ नंबर वडाको संयोजनमा भएको उक्त प्रतियोगितामा महिला तर्फ दोस्रो दिपा बस्नेत, तेस्रो ईन्द्रकला लिम्बू (निक्की) र पुरुष तर्फ दोस्रो ओसन राई र तेस्रो स्काई लिम्बू बनेका छन्।
विश्व शान्तिको लागि प्रथम, दोस्रो र विभिन्न युद्धमा सहिद भएका बीर गोर्खालीहरुको सम्मान र स्मृतिमा हरेक ५ अप्रिमा मनाईने पुर्खा दिवसको अवसरमा आयोजित उक्त प्रतियोगिताका विजेताहरु प्रथम, दोस्रो र तेस्रो बन्ने धावक धाविकाले जनही क्रमशः नगद २० हजार, १० हजार र ५ हजार, मेडल र प्रमाण पत्र पाएका छन्।
दौडमा प्रथम हुने धावकधाविकालाई आगामी वर्ष सन् २०२६ मा हङकङमा हुने गोर्खा ट्रेल ब्लेजर रनमा सहभागिता जनाउन पाउने आयोजक संस्थाका अध्यक्ष महेन्द्र राईले जानकारी दिएका छन्।
आज बिहान धरान-१८ स्थीत रत्न चोकबाट सुरु भएको उक्त १० किमि दौड धरान-२० स्थीत गोर्खा स्मृति पार्कमा पुगेर सम्पन्न भएको हो।
उक्त कार्यक्रममा दोस्रो विश्वयुद्ध लडेका खोटाङ, जन्तेढुगाका हाल उदयपुर बेल्टार निवासी १०२ वर्षीय भूपू ब्रिटिस सैनिक दलबहादुर राई, धरान १८ रत्नचौक निवासी पूर्व ब्रिटिस गोर्खा सैनिक दिवंगत क्याप्टेन रत्नमान राईकी श्रीमति ८६ बर्षीय रामकुमारी राई, भूपू ब्रिटिस गोर्खा सैनिक ८५ वर्षीय कृष्णदेव राईलाई सम्मान गरिएको छ।
उनीहरुलाई कोशी प्रदेश सभा सदस्यहरु विजयकुमार राई, ममता गुरुङ, धरान उपमहानगरपालिकाका पुर्व मेयर तिलक राईलगायतद्वारा सम्मान गरिएको हो।
