धरान, धरानमा जारी २५ औं संस्करणको गोधुली रनिङ कप अन्तर वडा स्तरिय फुटबल प्रतियोगितामा विजयी सुरुवात गर्दै १५ नं. वडा क्वाटर फाइनलमा प्रवेश गरेको छ।
शनिबार धरान रंगशालामा भएको खेलमा ८ नं. वडालाई २–० ले गोल अन्तरले पराजित गर्दै १५ न वडा क्वाटर फाइनलमा प्रवेश गरेको हो।
खेलको २५ औं मिनेटमा १५ नं. वडाका एरिक गुरुङले उत्कृष्ट गोल गर्दै टिमलाई अग्रता दिलाएका थिए। खेलको पहिलो हाफमा १–० ले पछी परेको वडा न ८ ले खेलको दोस्रो हाफमा पुन: गोल खान पुगेको थियो।
खेलको ३९ औं मिनेटमा १५ न वडाको खेलाडिले प्रहार गरेको कर्नर किकलाई बचाउने क्रममा ८ नं. वडाका निवास मगरले आत्मघाती गोल गर्न पुगेका थिए। उनको आत्माघाती गोलसंगै पराजित बनेको ८ नं. वडा प्रतियोगिताबाट बाहिरिएको छ।
खेलको म्यान अफ द म्याच १५ नं. वडाका एरिक गुरुङ घोषित हुँदै नगद १५ सय पुरस्कार प्राप्त गरे। आइतबारको पहिलो खेलमा साँझ ५ः३० बजे ९ नं. वडाले १४ नं. वडाको सामना गर्नेछ भने दोस्रो खेलमा साझ ७ः३० बजे ४ नं. वडा र १ नं. वडा बीच खेल हुने आयोजकले जनाएको छ।
चैत्र २१ गतेसम्म सञ्चालन हुने प्रतियोगितामा धरानका १८ वटा वडा सहभागी छन्। २ नं. वडा र ७ नं.वडाले प्रतियोगितामा सहभागीता जनाउन सकेनन्।
प्रतियोगिताको विजेताले १ लाख ५० हजार र उप विजेताले ७५ हजार नगद पुरस्कार प्राप्त गर्नेछन् भने प्रतियोगिताको क्वाटर फाइलनमा पुगेको टिमले स्व. सुवास राई स्मृति सुपर ८ प्रतियोगितामा सहभागी हुने अवसर प्राप्त गर्ने आयोजक गोधुली क्लबका उपाध्यक्ष सतिस केसीले जानकारी दिए।
