धरान, धरानमा जारी २५ औं संस्करणको गोधुली रनिङ कप अन्तर वडा स्तरिय फुटबल प्रतियोगितामा १४ नं. वडा र ४ नं. वडाले विजयी सुरुवात गरेको छ।
धरानमा रंगशालामा आईतवार भएको खेलमा ९ नं. वडालाई २–१ गोल अन्तरले पराजित गर्दै १४ नं. वडा क्वाटर फाइनलमा प्रवेश गरेको छ। १४ नं. वडाकालागी निमेष तामाङले खेलको १६ औं मिनेटमा गोल गरेका थिए।
खेलको ५० औं मिनेटमा रन्जित खेत्रीले गोल गर्दै १४ नं. वडाको लागि अग्रता दोब्बर बनाएका थिए। ९ नं. वडाका लागि भने सानत्वना गोल खेलको अन्तिम मिनेटमा लेशन राईले फर्काएका थिए। खेलको म्यान अफ द म्याच १४ नं. वडाका गोलकर्ता निमेष तामाङ घोषित भए।
त्यस्तै, आइतबार नै भएको दोस्रो खेलमा ४ नं. वडाले १ नं. वडालाई ४–१ गोलको फराकिलो अन्तरमा पराजित गर्दै प्रिक्वाटर फाइनलमा प्रवेश गरेको छ।
४ नं. को जितको लागि आमोस राईले खेलको ५ औ मिनेटमा नै गोल गर्दै टिमलाई अग्रता दिलाएका थिए ! खेलको १५ औ मिनेटमा ४ न वडाको लागि आनन्द राईले गोल गर्दै टिमका लागि अग्रता दोब्बर बनाएका थिए।
पहिलो हाफमा २–० ले अघि रहेको ४ नं. वडाका लागि खेलको ५१ औ मिनेटमा सन्तोष लिम्बुले गोल गर्दै अग्रता तेब्बर बनाएका थिए। सुरुवातदेखि नै निक्कै दबाबमा परेको १ नं. वडाले लगतै एक गोल फर्काएको थियो।
खेलको ५२ औ मिनेटमा सुलभ लिम्बूले गोल फर्काउदै खेललाई ३-१ स्थितिमा ल्याएका थिए। खेलको इन्ज्युरी समयमा सन्तोष लिम्बुले थप एक गोल गर्दै ४ न वडाले फराकिलो अन्तरमा जित दर्ता गरायो।
खेल अवधिभर निक्कै दवाब खेप्नु पर्दा खेलको लयमा फर्कन नसकेको १ नं वडाले नमिठो हारसंगै पहिलो खेलबाटै प्रतियोगितामा बाहिरिनु पर्यो। खेलको म्यान अफ द म्याच सन्तोष लिम्बु नै घोषित भए।
सोमबारको पहिलो खेल साझ ५ः३० बजेदेखी १८ नं. वडाले १९ नं. वडाको सामना गर्नेछ भने दोस्रो खेलमा साझ ७ः३० बजे ३ नं. वडा र ११ नं. वडा बीच खेल हुने आयोजकले जनाएको छ।
चैत्र २१ गतेसम्म सञ्चालन हुने प्रतियोगितामा धरानका १८ वटा वडा सहभागी छन्। २ नं. वडा र ७ नं.वडाले प्रतियोगितामा सहभागीता जनाउन सकेनन्।
प्रतियोगिताको विजेताले १ लाख ५० हजार र उप विजेताले ७५ हजार नगद पुरस्कार प्राप्त गर्नेछन् भने प्रतियोगिताको क्वाटर फाइलनमा पुगेको टिमले स्व. सुवास राई स्मृति सुपर ८ प्रतियोगितामा सहभागी हुने अवसर प्राप्त गर्ने आयोजक गोधुली क्लबका उपाध्यक्ष सतिस केसीले जानकारी दिए।
