धरान, धरान १४ न. वडा धरानमा जारी २५ औं संस्करणको अन्तर वडा स्तरिय टेष्टी टेष्टी गोधुली रनिङ कप फुटबल प्रतियोगिताको फाइनलमा प्रबेश गरेको छ।
मंगलबार साझ धरान रंगशलामा भएको दोस्रो तथा अन्तिम सेमिफाइनल खेलमा १७ नं. वडालाई ३-२ गोल अन्तरले पराजित गर्दै १४ नं. वडा उपाधी नजिक पुगेको हो।
१४ न वडाले उपाधीका लागि चैत्र २१ गते १५ न वडाको सामना गर्नेछ। खेलको सुरुवात भएको ३ मिनेट अबित्दै केही बिबाद भएको थियो।
१४ नं. वडाका डिफेन्डरले डिबक्स भित्र १७ नं. वडाका तपन कार्कीलाई फल गरेको भन्दै निर्णायक मो. फारुख अहमदले १७ नं. वडालाई पेनाल्टी प्रहार गर्न दिएपछि खेलमा विवाद भएको थियो।
विवादका कारण १४ नं. वडाका खेलाडीले खेल्न नमानेपछि आयोजकले सहजीकरण गर्नुपरेको थियो। निर्णायकको निर्णय बमोजिम १७ नं. वडाले पेनाल्टी प्रहार गर्ने तर गोल नगर्ने सहमती भएसँगै करिब आधा घण्टा रोकिएको खेल सुरु भएको थियो।
१७ नं. वडाका कप्तान दिवस सुनुवारले पेनाल्टी प्रहार गर्दै १४ का गोल रक्षकलाई बल पास मात्रै गरेका थिए। विवादका बीच सुरु भएको पहिलो हाफमा ३३ मिनेटको समय थप गरिएको थियो । तर, खेलमा सुरुवाती अग्रता भने १७ नं. वडाले लिएको थियो।
खेलको ५० औं मिनेटमा सबिन राईको पासमा कृष्ण राईले गोल गर्दै १७ नं. वडालाई सुरुवाती अग्रता दिलाएका थिए। तर ४ मिनेट बित्न नपाउदै १४ नं. वडाले खेललाई बराबरी ल्याएको थियो।
दिपेश बस्नेतको क्रस पासमा १४ का कप्तान बिवेक राईले गोल गर्दै खेललाई १–१ गोलको बराबरीमा ल्याएका थिए। यस्तै, खेलको ६५ औं मिनेटमा १४ न वडाले थप एक गोल गर्दै खेललाई २-१ गोलको स्थितिमा ल्याएको थियो। विपिन श्रेष्ठको पासमा निमोश तामाङले हेड गोल गर्दै १४ नं. वडाले खेलमा अग्रता लिएको थियो।
दोस्रो हाफको ३४ औं मिनेटमा कृष्ण राईको पासमा सुशिल राईको उत्कृष्ट गोलमा १७ नं. वडा खेलमा पुनरागमन गरेको थियो। गोल किपरलाई लागेर रिबाउण्ड भएको बललाई पुनः प्रहार गरी सुशिल राईले जाली चुमाउदै खेललाई २–२ गोलको बराबरीमा ल्याउन सफल भएका थिए। तर, खेलको दोस्रो हाफको ३८ औ मिनेटमा १७ नं. वडाले गोल खान पुगेको थियो।
निमेश तामाङको निर्णयक गोलले १४ न. वडाले ३-२ गोलको जित दर्ता गर्दै फाइनलमा उपाधी भिडन्तको लागि १५ न. वडासंगको भेट समेत पक्का गर्यो। प्रतियोगिताको विजेताले १ लाख ५० हजार र उप विजेताले ७५ हजार नगद पुरस्कार प्राप्त गर्नेछन्।
यस्तै, प्रतियोगिताको क्वाटर फाइलनमा पुगेको टिमले स्व. सुवास राई स्मृति सुपर ८ प्रतियोगितामा सहभागी हुने अवसर प्राप्त गर्ने आयोजक गोधुली क्लबका उपाध्यक्ष सतिस केसीले जानकारी दिए।
