धरान, धरान १५ न वडा धरानमा जारी २५ औं संस्करणको अन्तर वडा स्तरिय टेष्टी टेष्टी गोधुली रनिङ कप फुटबल प्रतियोगिताको उपाधी नजिक पुगेको छ।
सोमबार साझ धरान रंगशलामा भएको पहिलो सेमिफाइनल खेलमा ५ नं. वडालाई टाइब्रेकरमा ४-२ गोल अन्तरले पराजित गर्दै १५ नं. वडा फाइनलमा प्रबेश गरेको हो। अब उपाधीका लागि १५ न वडाले चैत्र २१ गते १७ न वडा र १४ न वडाबिचको बिजेता टोलीसँग प्रतिस्पर्धा गर्नेछ।
निर्धारित समयमा दुबै टिमले खेल गोल रहित बराबरी खेलेपछी खेलको नतिजा टाइब्रेकरबाट निकालिएको थियो। ५ नं. वडाका टेकराज लिम्बू र बिपुल मगर गोल गर्नबाट चुक्दा ५ न. वडाको यात्रा सेमिफाइनल आएर टुंगियो। टेकराज लिम्बुको प्रहार माघिल्लो बारमा ठोक्किएर फर्किएको थियो भने बिपुल मगरको प्रहार बाहिरिएको थियो।
१५ नं. वडाका लागि भने एरिक गुरुङ, मदन लाबुङ, आशुतोष राई र नगेन राईले गोल गरेका थिए। ५ नं. वडाका अमित विक र मन्दिप राईले मात्रै गोल गरेका थिए। खेल अवधिभर उत्कृष्ट प्रदर्शन गरेको ५ नं. वडाले स्कोर गर्न भने सकेन।
५ नं. वडाको करिब आधा दर्जन फ्रिकिक प्रहार १५ नं. वडाका गोल किपर प्रविण लिम्बूले उत्कृष्ट बचाउ गर्दै बिफल पारिदिएका थिए। खेलको म्यान अफ द म्याच १५ नं. वडाका सुगम जिमी घोषित भए। उनलाई नगद २ हजार पुरस्कार प्रदान गरिएको थियो।
फाइनलमा पुगेको १५ नं. वडाले प्रि क्वाटर खेलमा ८ नं. वडा र क्वाटर फाइनलमा १३ नं. वडालाई पराजित गरेर सेमिफाइनलको यात्रा तय गरेको थियो। त्यस्तै ५ नं. वडाले प्रि क्वाटरमा १६ र क्वाटर फाइनलमा ११ नं. वडालाई पराजित गर्दै सेमिफाइनलको यात्रा तय गरेको थियो।
मंगलबारको अन्तिम सेमिफाइनल खेल वडा नं. १७ र वडा नं. १४ बीच आयोजकले जनाएको छ। चैत्र २१ गतेसम्म सञ्चालन हुने प्रतियोगिताको विजेताले १ लाख ५० हजार र उप विजेताले ७५ हजार नगद पुरस्कार प्राप्त गर्नेछन्।
