धरान, धरानमा जारी २५ औं संस्करणको टेष्टी टेष्टी गोधुली रनिङ कप अन्तर वडा स्तरिय फुटबल प्रतियोगितामा १४ नं. वडा सेमिफाइनलमा प्रवेश गरेको छ।
शुक्रबार साँझ भएको दोस्रो खेलमा ६ नं. वडालाई २-१ गोल अन्तरले पराजित गर्दै १४ नं. वडाले अन्तिम चारको स्थान सुरक्षित गरेको हो।
पहिलो हाफ गोररहित बराबरी खेलेको थियो। दोस्रो हाफको सुरुवातमा नै १४ नं. वडाले अग्रता बनाएको थियो।
खेलको ५३ औं मिनेटमा आशिर पुरीको फ्रिकिक प्रहार गोलमा परिणत भएसंगै १४ नं. वडाले अग्रता बनाएको थियो। एक गोलले पछि परेको ६ नं. वडाले खेलको ६३ औ मिनेटमा खेललाई बराबरीमा ल्याएको थियो।
अजय विष्टको लामो पासलाई अर्जुन लिम्बूले पिपक्षी दुई जना डिफेन्सलाई छक्याउदै सुन्दर गोलमा परिणत गरेसंगै खेल १-१ गोलको स्थितिमा आएको थियो। तर, खेलको इन्ज्युरी समयमा ६ नं. वडाले गोल खान पुगेको थियो।
आशिष पुरीको निर्णायक गोलले १४ नं. वडाले सेमिफाइनलको यात्रा तय गर्यो। खेलको म्यान अफ दि म्याच पनि वडा न. १४ का पुरी घोषित हुँदै नगद २ हजार पुरस्कार पाएका थिए।
शुक्रबार धरानको ११ नं. वडा र ५ नं. वडा बीच खेल हुने आयोजकले जानकारी दिएको छ। चैत्र २१ गतेसम्म सञ्चालन हुने प्रतियोगितामा धरानका १८ वटा वडा सहभागी छन्।
प्रतियोगिताको विजेताले १ लाख ५० हजार र उप विजेताले नगद ७५ हजार रुपैया पुरस्कार प्राप्त गर्ने आयोजकले जनाएको छ।
प्रतियोगिताको क्वाटर फाइलनमा पुगेको टिमले स्व. सुवास राई स्मृति सुपर ८ प्रतियोगितामा सहभागी हुने अवसर प्राप्त गर्ने आयोजक गोधुली क्लबका उपाध्यक्ष सतिस केसीले जानकारी दिए।
