धरान, धरानमा जारी २५ औं संस्करणको गोधुली रनिङ कप फुटबल प्रतियोगितामा १८ नं. वडा र ११ नं. वडा विजयी भएका छन्।
धरान रंगशालामा सोमबार भएको पहिलो खेलमा वडा न १८ ले वडा न १९ लाई टाइब्रेकरमा ३-२ गोल अन्तरले हराउदै क्वाटरफाइनलको स्थान सुरक्षित गरेको हो।
प्रबल राईले खेलको २३ औं मिनेटमा गोल गर्दै १८ नं. वडालाई सुरुवाती अग्रता दिलाएका थिए। तर, पहिलो हाफको इन्जुरी समयमा प्रमेश राईको गोल मार्फत् वडा नं. १९ ले खेललाई बराबरीमा ल्याएको थियो।
खेलको ६१ औं मिनेटमा अतित राईले १९ नं. वडाका लागि गोल गर्दै टिमलाई २–१ को स्थितिमा ल्याएका थिए। तर दोस्रो हाफको इन्जुरी समयमा १९ न वडा खेलमा समालिन नसक्दा गोल खान पुगेको थियो।
१८ नं. वडाका सौनाक श्रेष्ठले गोल गरेपछि खेल २–२ गोलको बराबरीमा पुगेको थियो। खेलको निर्धारित समयमा दुबै टिमले २-२ गोलको बराबरी खेलेपछी खेलको छिनोफानो ट्राइब्रेकरबाट लिइएको थियो।
टाइब्रेकरमा १८ नं. वडाका लागि निकेन राई, सौनक श्रेष्ठ र रोशन उराउले गोल गरेका थिए भने। उज्वल राई र बिवेक परियारले गोल गर्न चुकेका थिए।
१९ नं. वडाका लागि सनम लिम्बू र इन्सन राईले गोल गर्दा आयाम राई, अभिशेख राई र नाम्बाहाङ लिम्बूको प्रहार विपक्षि गोल किपर धिरज बस्नेतले रोकिदिएपछी ६ पटकको बिजेता वडा न १९ प्रतियोगिताबाटै बाहिरिएको छ। खेलको म्यान अफ द म्याच बस्नेत नै घोसित भए।
त्यस्तै, सोमबार नै भएको दोस्रो खेलमा वडा नं. ११ ले वडा नं. ३ लाई ३–१ गोल अन्तरले पराजित गर्दै क्वाटर फाइनलमा स्थान सुरक्षित गरेको छ। पराजित भएको ३ नं. वडा प्रतियोगिताबाट बाहिरिएको छ।
खेलको सुरुवातमा ३ नं. वडाले अग्रता बनाएको थियो ! खेलको छैठौ मिनेटमा नै ३ नं. वडाका युनिक लिम्बूले गोल गर्दै टोलीलाई अग्रता दिलाएका थिए। पहिलो हाफ अत्यन्तै राम्रो प्रदर्शन गरेको ३ नं. वडाले दोस्रो हाफमा खेलको लय गुमायो।
११ नं. वडालाई अफसाइड ट्रयापमा राख्दै दबाबमा राखेको ३ नं. वडाले दोस्रो हाफमा भने ३ गोल खान पुग्यो। ११ नं. वडाका पवन राईले दुई गोल गरे भने प्रविण राईले एक गोल गरे। खेलको म्यान अफ द म्याच ११ नं. वडाका पवन राई घोषित भए।
सोमबार पहिलो खेलमा साझ ५ः३० बजे १७ नं. वडाले २० नं. वडाको सामना गर्नेछ भने दोस्रो खेलमा साझ ७ः३० बजे ४ नं. वडा र १३ नं. वडा बीच खेल हुने आयोजकले जनाएको छ।
चैत्र २१ गतेसम्म सञ्चालन हुने प्रतियोगितामा धरानका १८ वटा वडा सहभागी छन्। २ नं. वडा र ७ नं.वडाले प्रतियोगितामा सहभागीता जनाउन सकेनन्।
प्रतियोगिताको विजेताले १ लाख ५० हजार र उप विजेताले ७५ हजार नगद पुरस्कार प्राप्त गर्नेछन् भने प्रतियोगिताको क्वाटर फाइलनमा पुगेको टिमले स्व. सुवास राई स्मृति सुपर ८ प्रतियोगितामा सहभागी हुने अवसर प्राप्त गर्ने आयोजक गोधुली क्लबका उपाध्यक्ष सतिस केसीले जानकारी दिए।
