धरान, नेपाल उद्योग तथा व्यवसायी महासंघ धरानद्वारा धरानमा आयोजित १५ दिने 'बिजनेस एक्स्पो-२०८१'को आज उदघाटन भएको छ।
आजबाट फागुन १० गतेसम्म धरान रंगशालामा संचालित एक्स्पोको उदघाटन कोशी प्रदेशका मुख्यमन्त्री हिक्मतकुमार कार्कीले गरेका छन्।
नेपाल उद्योग तथा व्यवसायी महासंघ धरानका अध्यक्ष शिवराज श्रेष्ठको सभापतित्वमा आयोजित एक्स्पोकोको उदघाटन कार्यक्रममा मुख्यमन्त्री कार्कीले विजनेज एक्स्पोले धरानको अर्थतन्त्रलाई चलायमान बनाउदै धरानको उद्योगी व्यवसायीको आर्थिक बिकासमा टेवा पुर्याउने बताए।
उक्त एक्स्पोलाई सफल बनाउन आफ्नो तबरबाट पूर्ण सहयोग गर्ने र सम्पूर्णमा पनि एक्स्पो सफल बनाउन आग्रह गरे।
कार्यक्रममा विशेष अतिथि रहेका नेपाल उद्योग तथा व्यवसायी महासंघका केन्द्रीय अध्यक्ष भगिरथ सापकोटा, नेपाल उद्योग परिसंघका केन्द्रीय उपाध्यक्ष भीम घिमिरे, कोशी प्रदेश सभा सदस्य विजय राईलगायतले एक्स्पोको सफलताको शुभकामना दिए।
यसैगरी एक्स्पोको मुलसंयोजक उपाध्यक्ष राजेश अग्रवालले कार्यक्रममा सहयोगीहरुलाई धन्यबाद ज्ञापन गरे, भने उद्घाटन कार्यक्रममा कोशी प्रदेशका पुर्व सभामुख प्रदीप भण्डारी, पुर्व संघीष सांसद जय बान्तावा राई, कोशी प्रदेश सभा सदस्यहरू विजय राई, रमेशकुमार बस्नेत, यशोदा कायस्थ, नेकपा एमाले केन्द्रीय सदस्य मन्जु भण्डारी, नेकपा एमाले कोशी प्रदेश प्रचारप्रसार सहसंयोजक भीमज्वाला राई, एस.एस.पी. भीम दाहाललगायतको उपस्थिति रहेको थियो।
धरानको व्यापार व्यवसायलाई चलायमान बनाउन र स्थानीय व्यापारिक उत्पादनलाई प्रवर्धन गर्दै धरानको आन्तरिक पर्यटनलाई वृद्धि गर्ने उदेश्य सहित विजिनेश एक्स्पो धरान २०८१ प्रारम्भ गरिएको नेपाल उद्योग तथा व्यवसायी महासंघ धरानका अध्यक्ष शिवराज श्रेष्ठले जानकारी गराए। एक्स्पो फागुन १० गतेसम्म सञ्चालन हुने पनि श्रेष्ठले जानकारी दिए।
विजिनेस एक्स्पोको आज साँझको कार्यक्रममा राजेशपायल राईको एकल प्रस्तुति हुने भएकोछ। साँझ ८ बजे राई इज किङको उपनामले ख्याति कमाएका राजेशपायल राईले एकल प्रस्तुति हुनेछ।
राजेशपायल राईको सबैभन्दा बढी फ्यान रहेको पूर्वको शहर मध्ये धरान एक नम्बरमा आउँछ। धरान भनेपछि हुरुक्कै हुने राईले पछिल्लो एक वर्षयता धरानमा एकल प्रस्तुति दिने समय पाएका थिएनन्। भर्सटायल गायक राई स्टेजका पनि किङ नै मानिन्छन्।
धरानमा हुने राजेशपायल राईका सबै कार्यक्रमहरुले दर्शकहरुको साथ पाउँदै आइरहेको छ। सांगीतिक संघर्षका सुरुवाती दिनहरु धरानबाटै थालेका राई करिव साढे तीनदशक नेपाली गीत संगितको शिर्षस्थानमा राज गरिरहेकाछन्।
आज एक्स्पोको उद्घाटनका दिन राईले मैले मायाले दिएको चिनो लगायत उनका पछिल्लो चर्चाको शिखरमा रहेका दर्जनौ गीतहरुबाट एक्स्पोमा आउने आगन्तुकहरुलाई मनोरञ्जन दिलाउने आयोजकले जानकारी गराएका छन्।
